اخيرا وبعد طول انتظار وبعد المعاناه الفظيعه وبعد عذاب وبعد ماكل بنات العيله وعيلة العيله وجميع الاهل والاقارب والاصدقاء والجيران اتجوزوا وخلفوا وولادهم الحلوين الاطائيط بقوا يقولوا يا طنط (طنط لما تنططهم كلهم) اخيرا اتخطبت طبعا شيء غير متوقع خالص والغريب ان كل حاجه حصلت بسرعه جدا وكانت الصدمه لما اتصلت بيا طنط ام شوشو حبيبة قلبي مامة شوشو صاحبتي وحبيبة قلبي برضه وقالتلي في التليفون انا جبتلك عريس ياسوسو (اقفش اخيرا احمدك يا رب)وبعد ماقالت لي كل ظروفه هييه موافقه ياحبيبتي اديهم رقم تليفونك طبعا يا طنط ودي عايزه كلام وبعد ماقفلت معاها مفيش نص ساعه واتصلت اخته وهاتك ياحب وهزار وضحك في التليفون وضربت معايا صحبيه من اول نظره وحسستني اني عروسه لقطه ومفيش زيي اتنين ايه العسل ده وتاني يوم اتصلت مامته اللي هي برضه عسل زي بنتها وكمان حددت ميعاد وقالت انها حتزورنا بكره هي وابنها ياسلاااام شوفوا الحياه حلوه ازاي وكل حاجه سهله وجميله وتاني يوم لبست واتشيكت وبقيت علي سنجة عشره عروسه بقي وفوجئت ان العيله كلها داخله علينا من الباب يعني مش بس العريس وامه لا ده هو وامه وابوه واخوه الكبير واخوه الوسطاني والغريب ان الجيش ده كله داخلين علينا ايديهم فاضيه مفيش ربع كيلو شيكولاته حتي ماعلينا يمكن عشان اول مره واول ما عيني وقعت علي العريس اكتشفت انه ملتحي تم تم تم تش الحقيقه هي ماكنتش اول مره يتقدملي فيها شاب ملتحي صحيح كان ليا معاهم ذكريات مهببه حابقي احكي لكم عليها بعدين لكن الشهاده لله الواد ده كان زي القمر اول ماتكلمنا لقيته شخصيه جذابه جدا مش بس انا ده كمان كل اللي كانوا موجودين يقعد يتكلم مع كل واحد مفيش عشر دقايق تلاقيه منبهر بشخصيته واخلاقه وذكائه وطموحه و..و..و....باختصار قدر يكلفتني ويكلفت العيله كلها من اول قعده وفوق ده كله الاستاذ مادياته ممتازه الي جانب ان العيله الكريمه ساكنين في فيلا كبيره في منطقه جديده وسعيدة الحظ اللي هي انا حيكون ليها شقه في الفيلا وعزمونا علي الغدا عندهم بعد اسبوع عشان نتفرج عليها الغريب انهم حسسوني ان هما اللي قفشوني مش انا اللي قفشته كانوا طايرين بيا خصوصا ان الاستاذ كان متجوز قبل كده وطلقها لانها كانت وحشه وشريره ومش بتحبنا وحاولت تفرق بيننا كتير وكمان كانت مش بتخلف وصمموا علي قراءة الفاتحه في اول قعده كده علي طول ماما قالت مش ممكن لازم ناخد راي اخوها اللي في الخليج الاول لقيته بمنتهي الرقه بيقوللي انتي معاكي نمرته قلت ايوه طب ممكن تديهالي بس كده اتفضل وبسرعه طلع الموبايل من جيبه وكلمه وزي ما العيله كلها اتكومت اخويا اوام اوام هو كمان اتكوم واعجب بيه جدا من قبل مايشوفه مش بس كده ده كمان وافق علي الخطوبه وقرا معانا الفاتحه علي الموبايل ايه السحر ده مش باقول لكم شخصيه جذابه جدا ولقيت الموبايل بتاعه ده بيلف علي البيت كله نفر نفر واشي سلامات علي اهلانات اكتر من 30 دقيقه ياسلام ايه الكرم ده كله معقوله اكتر من 100 جنيه في مكالمة تليفون يا سلام علي عريسي الكريم الجميل احمدك يارب بعد ما مشيوا بحوالي نص ساعه لقيت حماة المستقبل بتتصل بيا عشان تقوللي معلش بقي يا حبيبتشي انتوا ليكوا عندنا علبة شيكولاته اصلنا نسيناها في العربيه انا مكسوفه منك خالص لا يا طنط ماتقوليش الكلام ده عموما حنبقي نجيبهالكوا معانا المره الجايه قفلت معاهاوتنحت شويه لكن معلش معلش بتحصل في احسن العائلات جايز نسيوها فعلا ومن تاني يوم لقيت عريسي الجميل بيتصل بيا يوميا ويسمعني احلي كلام يا سلااام وكمان رومانسي والله وصبرتي ونلتي يابت وبعد يومين كانت اول زياره لخطيبي الجميل ولقيته جايب معاه علبة الشيكولاته اياها ويا ريته ما كان جابها اصلها علبة شكولاته نص كيلو شكلها متاكله قبل كده وشاريينها من فرنه تحت بير السلم ولقيته جايب في الايد التانيه شنطه سودا قلت يا مسهل لازم جايبلك هديه حلوه يا بت يعوض بيها الشوكلاته فتحت الشنطه لقيت فيها ايييييييه قولوا انتوا بقي ؟ لقيت 2 كيلو موزضاربهم الشمس وبرضه متاكلين قبل كده الظاهر ان الموز الاصفر اللي كلنا عارفينه عندهم هما لونه اسود قلت ماعلينا كبري دماغك يابت يمكن اتزنق في فكهاني وهو جاي و شاف الراجل بتاع الموز عاوز يروح فصعب عيه واشتري منه شوية الموز اللي معاه بدل ما يترمي مش مهم الزياره دي المهم بقي الزياره اللي بعده لقيته داخل عليا بشنطتين سود شكلهم مدور حطيت ايدي علي قلبي وقلت استر يارب مصيبه لا يكونوا قنبلتين يا لهوتييييي استجمعت شوية الشجاعه اللي حيلتي ورحت فتحت الشنطتين ولقيت فيهم بطيختين كل بطيخه فيهم شكلها بيقول انها كانت برتقانه وربنا فتحها عليها وكبرت وبقت بطيخه هو ايه حكايته الجدع ده يكونش فاكرني عندي انيميا ولا نقص في الفاكهه ده حتي كل مابيزورنا بنقدمله اشكال والوان من الحلويات والعصاير والفاكهه والشاي والقهوه بالف هنا وشفا يا عريسي ماباعدش عليك والله بس في الحقيقه انا بدات اشك فيه انه ممكن يكون بخيل خصوصا اني متعقده من الصفه دي وكمان مر عليا قبل كده عرسان بخلاء ربنا يحفظنا فقررت اعمل له اختبار صغنطوط (ركزوا يا بنات) وفي مكالمه من مكالماته الجميله سالته انت جاي عندنا بكره ايوه يا حبيبتي مستنياك يا حبيبي اوعي تتاخر عليا عاوزاك بكره تجيبلي معاك هديه حلوه خالص وماتنساش ان دي اول هديه حتقدمهالي عموما انا مش حاطلب بس لما اشوف بقي قيمتي عندك اد ايه رد عليا بذكاء بس المشكله ان مفيش هديه في الدنيا كلها تساوي قيمتك عندي وعشان كده مش حالاقي هديه اقدمهالك فرديت عليه بنفس الذكاء بس اي هديه حتقدمها لي حتبقي عندي اغلي هديه في الدنيا لان انت اللي حتجيبها لي قاللي طيب بس كده وانا بقي حاجيبلك احلي واغلي هديه في الدنيا طبعا احنا الاتنين بنتذاكي علي بعض ومبروم علي مبروم مايرولش زي ماكلنا عارفين وفضلت قاعده حاطه ايدي علي قلبي مستنيه نتيجة الاختبارواستنيته اول مادخل من باب الشقه لقيت في ايده شنطة هدايا شكلها يقرف قلت ماعلينا المهم اللي جواها فتحتها لقيت جواها مصحف قديم محطوط في علبته واضح ان حد كان جايبهولوا هديه من القرن اللي فات فقال يستفيد منه ويجيبهولي هديه بدل ماهو مركون في البيت ولقيت معاه بروازين بلاستيك صغيرين فاضيين من اللي بيتحط جواهم الصور الواحد ب2جنيه ونص شكله كده جابهم عشان نحط فيهم صورتي وصورته ونحطهم ادام بعض عشان يطلعوا صور صغيره قلت يا بت فوتي دي كمان ماعلينا يمكن مابيفهمش في الحاجات دي المصيبه بقي اننا قبل مانروح نتفرج علي الفيلا بيوم واحد لقيت مامته بتتصل بيا عشان تسالني هو انتوا جايين لنا بكره يا حبيبتشي ايوه يا طنط ومين اللي حييجي مين ايه؟ احنا ايوه كام نفر يعني ؟ ماعرفش بالظبط يا طنط لسه ماحددناش وحتيجوا الساعه كام؟ حوالي الساعه 6 يبقي انتوا بقي يا حبيبتشي مش حتتغدوا معانا اصل احنا بنتغدي الساعه 2 عشان معاد الدوا واحنا بقي مش حنستناكوا يا لهويييييي الست بتسحب العزومه بصنعة لطافه ماعلينا اتغدوا انتوا يا طنط بالهنا والشفا واحنا حنتغدي في بيتنا ده احنا حتي عندنا اكل لدرجة اني فكرت اخد لنا صوره ع الموبايل واحنا قاعدين بناكل عشان تطمن اننا جايين واكلين والحمدلله ويوم مازرناهم لقيناهم بيقدموا لنا شاي بلبن هما لسه صاحيين م النوم ولا ايه ومعاه حاجه شكلها غريب كده بيقولوا انها بسبوسه عاملينها في البيت وسمحوالنا نقعد مع بعض شويه لوحدنا وخطيبي الرومانسي الجميييل كان فرحان لدرجة انه كان عاوز ياكلني الشيء الغريب ده بايده واللي اول مادقته حسيت اني عاوزه اتف بس ياخساره ماكانش معايا منديل حاتف فين يعني في وشه مش معقول طبعا وف عز ماهو كان بيتكلم ويقوللي في كلام حلو لقاني حاعيط من شدة التاثر مش بسبب كلامه لكن من الشيء الغريب اللي اكلهولي عمركوا شفتوا بسبوسه معموله بالزيت بالزيت يا مفتري قلت يا بت ماعلينا تاني يوم لقيته بيتصل بيا وبيقوللي عندي ليكي خبر حلو اوي انا اشتريت المطبخ نعم ياخويا منك لنفسك كده من غير ماتقوللي مش لازم انا اتفرج واختار اصله كان حلو اوي ولقطه وبعدين انا كمان ذوقي حلو اوي وحيعجبك وماتنسيش ان انا الراجل وان انا باعرف اكتر منك وبافهم اكتر منك طبعا اتقمصت شويه لكن لقيته تني يوم اتصل يصالحني واخته تصالحني ومامته تصالحني قلت يابت خلاص ماعلينا لكن ماتعملهاش تاني حاضر يا حبيبتي لقيته بعد كام يوم اتصل بيا وبيقوللي اما انا محضرك حتة مفاجاه استر ياللي بتستر مفاجاة ايه يا حبيبي انا اشتريت اوضة النوم و الانتريه يا لهووووي وده طبعا لانهم حلوين ولقطه ولانه بيفهم اكتر مني ده غير ان ذوقه حلو وبعد مازعلتلي شويه كالعاده قلت ماعلينا واتصالحنا واكتشفت بعد كده انه اشتري الحاجات دي كلها لوحده لانه راح مكان رخيص واشتري منه حاجات رخيصه وماخدنيش معاه عشان مايتدبسش في حاجات غاليه واتاكدت من ده لما لاقيته جاي فرحان اوي وهو بيفتح الموبايل وبيفرجني علي صور الاوض اللي اشتراها وياريته ماكان فرجني ما شاء الله حاجه تقرف والمهم اني كنت عماله باتفرج وراسمه علي وشي ابتسامه متخلفه ومفيش علي لساني غير الله جمييييييل ذوقك حلو خالص يا حبيبي وقلت ماعلينا خليني اتجوز بقي كفايه عليا كده بعد كده طقت في دماغ خطيبي انه يلبسني النقاب ال ايه عشان انا حلوه ماشي يا سيدي النقاب مش وحش البسه بعد الجواز قاللي لا تخرجي بكره تشتريه وتلبسيه وانتي ماشيه في الشارع نعم ازاي يعني بس اسمعي كلامي واطيعيني عشان انا الراجل وباعرف اكتر منك وبافهم اكتر منك واتصل بيا تاني يوم اشتريتي النقاب لا لسه يعني ايه لسه ازاي لسه وهاتك يا تهزيق والصوت العالي اشتغل والتجعير اللي يخرم الودان من بعد الرومانسيه والنحنحه لقيت نفسي باستاذنه وباقفل التليفون من غير ولا كلمه وكالعاده اتقمصت شويه فاتصل صالحني ومامته صالحتني وانا قلت ماعلينا كل الرجاله عصبيين بعد كده قرر خطيبي الجميل انه ينزل مبلغ شرا الشبكه للنص وانا قلت ماعلينا وبعدين قرر اننا مانعملش فرح طبعا ماهو حضرته اتجوز قبل كده ولما سالته ليه قال مش مهم فرح المهم نبقي مع بعض ياحبيبتي قلت ماعلينا ياحبيبي وبعد مااتحدد معاد الفرح اخيرا وقبل الزفاف باسبوعين قلت لخطيبي الجميل اني عاوزه اروح ااجر فستان الفرح واشتري جزمة الفرح وكمان احجز عند كوافيره (واحده ست يعني) لقيته بيقوللي بمنتهي الهدوء مش مهم الفستان مش مهم الكوافيرالمهم يا حبيبتي نبقي مع بعض انا عاوزك زي ما انتي كده ازاي يعني مش مهم فستان يعني حالبس ايه جلابيه ضحك خطيبي الظريف وقاللي وايه يعني وبعد طول عناء ومحايله لقيته بيقوللي هو انتي مش معاكي فلوس كتير خلاص روحي اتصرفي من معاكي انا قفلت معاه ولقيت نفسي متنحه حاولت اقول ماعلينا ماعرفتش ده ايه الذل ده انا حسيت اني باشحت منه ابسط حقوقي وكمان مش عارفه اشحتها وقتها بس قررت اني افسخ الخطوبه بس زعلت اوي لاني نسيت اساله لماهو الفستان مش مهم ياتري الجزمه مهمه ولا لا طبعا انا لو كنت سالته كان حيقوللي مش مهم تمشي حافيه المهم نبقي مع بعض يا حبيبتشي
ملحوظه : بعد مافسخت الخطوبة باسبوع اكتشفت ان خطيبي الجميل منوفي مش صعيدي زي ما كان بيقول عموما دي مش مشكله خالص ماعلينا بس المشكله اني اكتشفت كمان انه ماطلقش مراته الاولانيه هما انفصلوا بس وهي قاعده عند اهلها ومستنيه الطلاق لكن هو رافض يطلقها لانه مش عاوز يدفع المؤخروكان مش عاوز يعمل فرح عشان مراته ماتعرفش انه تجوزعليها
ايه رايكم لحد دلوقتي؟ ساعات باحس اني ندمانه لاني سبته ورجعت وقفت في الطابور من تاني خصوصا انه زمانه اتجوز وخلف وانا لسه زي ما انا ياتري بعد كل ده كان ينفع استمر معاه واقول ماعلينا؟
